أشار رئيس التيار الوطني الحر النائب جبران باسيل في كلمة له خلال لقاء في باريس إلى أن “اللقاء هنا له دائماً نكهة مميزة، ففرنسا بتبقى دايماً الأرض يلّي إحتضنت العماد ميشال عون بمنفاه وقت يلّي إضطهدنا وأقصينا، وهي أرض الحريّات يلي أطلق منها التيار وال RPL معركة إستعادة الحرية والسيادة والإستقلال للبنان، وعمت العالم ووصلت لأميركا بقانون إستعادة السيادة ومنها رجعنا محرّرين للبنان، فرنسا هي الأرض يلي عم تنطلق منها اليوم معركة تحرير لبنان من الفساد والفاسدين، والشرارة الأولى بمعركة إنهاء زمن اللاعقاب طلعت من باريس بمذكرة التوقيف الدولية يلّي صدرت بحق حاكم لبنان وسارق أموال اللبنانيين رياض سلامة”.
وأردف باسيل: “مثل ما إنتصرنا بتحقيق سيادة لبنان وإستقلاله إنطلاقاً من باريس، رح ننتصر بتحقيق العقاب وإنهاء حالة اللاعقاب للسارقين انطلاقاً من باريس”.
وتابع: “أقرب المقربين إلي ضلّوا لمبارح يقولوا لي: “من عقلك بيتلاحق أو بيتحاكم أو بيتوقف رياض سلامة؟” وأنا قول إنو “ما ممكن شعب حيّ فيه تيار حيّ ينكسر قدّام حاكم متحكم بأمواله”، سائلاً: “وين كانوا بمعركة الكهرباء لما نحنا كنا عم نحارب كرمال نجيبها؟ وين كانوا بمعركة النفط والغاز لمّا نحنا كنا عم نطلّع قوانينها ومراسيمها وعم يوقفوهم؟ وين كانوا بمعركة التدقيق الجنائي لمّا نحنا كنا عم نحاول نمرره؟ وين كانوا بمعركة قانون الكابيتال كونترول لما كنّا عم نحاول نقرّه بمجلس النواب وبعد ما أقرّ على رغم 3 سنين ونص؟ وين كانوا بمعركة إستعادة الأموال المحوّلة للخارج وبمعركة قانون كشف حسابات وأملاك السياسيين والقائمين بالخدمة العامة؟ وين كانوا ووينهم اليوم بمعركة معاقبة رياض سلامة وعصابته؟”.
أضاف باسيل: “بعد في رؤساء ووزراء ونواب وقضاة واصحاب مصارف وصحافيين واعلاميين وسياسيين واصحاب نفوذ. رح نلحقكم واحد واحد انتوا يلّي سرقتونا وسرقتوا شعبنا وتهكّمتوا علينا وموّلتوا عمليات الاغتيال السياسي بحقنا”.
وشدد باسيل على أن “التيار رح يستمرّ بنبضه وبنضاله بالاستمرار بخط ومسار لتحرير البلد من الفساد، ورح يتلاقى مع خطوط قضائية داخلية وخارجية – مش قضاء داخلي، بعض القضاة اللبنانيين الاستثنائيين- وقضاء دولي اوروبي وان شاء الله ما بيطوّل حتى يصير اميركي؛ وكلما بيتقاطعوا بيسقط حدا من المنظومة، والأهم رح يكون سقوط الرؤوس السياسية والكبيرة، هيدا رح يكون تقاطع بين ارادة سياسية ثابتة وداخلية لبنانياً ورغبة خارجية بالتخلي عمّن استنفدوهم واستهلكوهم، وهيدا رح يكون سقوط عظيم”.
ولفت باسيل إلى أن “الملفات اليوم عم تنكشف، وورقة عم تكشف الثانية، وملف عم يكشف التاني، واعتراف عم يجرّ التاني، وقاضي عم يلحق التاني، ودولة عم تلحق الثانية… وهيدي ما رح توقف. التيار الوطني الحر ما رح يوقف ولا يتعب ورح يكمّل بمساره الثابت، ورح تتقاطع معه مسارات ثانية بدايتها بفرنسا واوروبا ونهايتها باميركا… وبكل تقاطع رح يسقط راس كبير”.
______________________________
🌍 للاطلاع على أحدث الأخبار المحلية والعالمية من وكالة نيوز ليبانون بإمكانكم متابعتنا على الروابط التالية:
قم بكتابة اول تعليق